Trapani

بسم الله الرحمن الرحيم

Trapani

_________________

مطعم ترباني من المطاعم الإيطالية اليديدة في الكويت، الطعم يتبع مطعم ملنزاني (Melenzane) وراح تلاحظون الشبه بالمنيو و الفكرة الغريبة المميزة للديكور الداخلي.

ترباني تحصلونه في مروج ، له قعدة خارجية تناسب الأجواء الشتوية و الليلية 😎👍، و أيضا تتوفر القعدة الداخلية بديكورها الغريب المميز، شخصيا ما حبيت القعدة الداخلية لأن ألوانها عتمة 😅 غير جذي ديكورها وايد حلو.

شنو جربنا؟جربنا الباستا و كانت وايد حلوة و خاصة طريقة التقديم حدها ذربة 😍👏، وبعد جربنا البيتزا🍕 كانت خفيفة ولذيذة، و الأحلى الفرايز🍟 اللي طلبناه كان قمة اللذة 😭💕 لدرجة ماعندي مانع بس أرجع عشانه😏💯 

لا نطول عليكم، تفضلوا الصور : 📸

📌 اسم المطعم: Trapani

📍 موقع المطعم: مروج

📲 الرابط: Instagram

🌟 التقييم: 4/5

🌷💚

SBH

عندما تنطق الشخصيات!

بسم الله الرحمن الرحيم

عندما تنطق الشخصيات!

_______________________________________

مؤخرا بديت أطالع مسلسل قصته غريبة بس نوعا ما مو يديدة، المسلسل يتكلم عن قصة رسام ومؤلف للقصص الهزلية، وإن الشخصية الرئيسية إلي فيه بدت توصل لمرحلة الإدراك البشري بمعنى آخر بدت تصير حية، والمشكلة ان بنت الرسام نفسه صارت تدخل لعالم قصته و ترجع تطلع لين وجودها تسجل كشخصية رئيسية في القصة!

الكلام مو عن المسلسل، الكلام عن الشخصية الرئيسية لما تطلع لعالمنا وتواجه مؤلفها ورسامها! هني الكلام! يعني الحوار كان قوي، تخيل (ككاتب/مؤلف) شخصيتك تطلع جدامك وتناقشك بحياتها اللي انت ألفتها!

أكثر شي عورني لما الشخصية قالت لمؤلفها بما معناه إن شلون انت تشتهر و تربح ملايين بعد ما عذبتني و خليت حياتي مأساة وفوق هذا تبي تذبحني! شلون تقدر تتهنى بشهرتك على حساب حياتي اللي انت ألفتها و عذبتها و تبي تنهيها؟ منو عطاك الاذن ان تستانس على تعذيبي..- و يطول الحوار اللي فعلا تأثرت فيه وايد.

ليش تأثرت؟ لأن كنت أكتب قصص و أعرضها أون لاين و بعض القصص كنت فعلا أبجي لما شخصيتي الرئيسية تتعذب أو الشخصيات الثانوية تبدا تموت، أنا ككاتبة أتأثر فيهم لأن أعدهم عيالي.. فما بالك لو وحدة من هالشخصيات طلعت لي و سألتني ليش أسوي فيها جذي؟ شنو بيكون ردي؟ مادري! بس فعلا تأثرت بكلامه و بالفكرة اللي خلتني أعيد التفكير الجدي بالكتابة القصصية مجددا.

🌷☕️

SBH


ملاحظة: الصورة تعود ملكيتها لأصحابها.

Canteen

بسم الله الرحمن الرحيم

Canteen

_______________

شخباركم مع الجو؟ ها زرتوا حديقة الشهيد ولا بعدكم؟ للي ماراحوا.. تعالوا بغيتكم بكلمة راس 🙄 اخواني خواتي الأفاضل شناطرين؟ 😒 ضروري تستمتعون بأجواء هالحديقة 😍 اللي يبيلي أكتب عنها على يوم 🤔، المهم ما علينا..عشان أحفزكم عالروحة، سمعوا، عندي لكم خوش مطعم: مطعم كانتين.

مطعم كانتين (Canteen) يتبع مطعم برذرز (Brothers) ، المطعم في حديقة الشهيد 🌲، له قعدة خارجية و داخلية، يمه محل تذكاري للحديقة و بعد غرفة للطلبة 🤓 (غرفة هادية للدراسة/ القراءة).

شنو عنده؟ عنده ريوق، غدا/عشا نظام أمريكي 🍴 ، أغذيته معروف عنها إنها عضوية وفوق هذا له كافيه خاص فيه، إي نعم قهوته و حليب الكاكاو عنده شي لازم تذوقه! ☕️🍫👍 خل آخذكم بجولة سريعة للمطعم:

ها اقتنعتوا؟ ياللا عيل خل نشوفكم هناك دام الجو يهبل تبارك الرحمن 💚😁👏

📌 اسم المطعم: Canteen

📍 موقع المطعم: حديقة الشهيد | Map

 📲 الرابط: Instagram

🌟 التقييم: 4/5

⚠️ ملاحظة: الصور دون توقيع اسم المدونة تعود ملكيتها لأصحابها.


🌷💚

SBH

قهوة تايم بارت 2

بسم الله الرحمن الرحيم

قهوة تايم

(بارت 2)

___________________

تذكرون الكافيهات اللي غطيتها؟ (هنا) هذا الجزء الثاني وماشاءالله اللستة قاعدة تزيد بدل لا تنقص 😍! فخل أوريكم هالمرة شنو جربت (مع الأخذ بالإعتبار كل كافيه زرته مرة واحدة فقط خلال كتابة هذا المقال):

Let's Coffee

كافيه يديد في منطقة قبلة (جبلة بالكويتي) يشتهر بلاتيه الورد 🌷 و لاتيه جوز الهند (الناريل)، مشكلتي مع هالكافيه إنه يسكر يوم اليمعة! وأنا غالبا أكون فاضية هالحزة عشان جذي تأخرت لين لقيت الوقت المناسب لتجربته 😅 ، جربت اللي بالورد و بصراحة حبيتها!💕 يعني اللي يحب ماي الورد راح تعجبه، الطعم غريب و مميز و الأغرب ان كمية الورد المجفف اللي حطها شلون ذابت و عطت نكهة قوية مستساقة مو مركزة نفس ماي الورد العروف!

His Majesty The Coffee

شفت لاقالوا الكتاب باين من عنوانه؟ هذا اقولك الوطنية باينة من عنوانة!🇰🇼 يا أخي كافي الرسم على الكوب ❤️ اللي يخليك تحس بتأنيب الضمير لا قطيته (جنك قاط علم ديرتك  فهمتوا الشعور 😅) .
الكافيه صغير له قعدة خارجية ، اللي راح يعجبك أكثر و أكثر الرسم اللي على الطوف 😎👏! و الله شي يونس يشرح الصدر ، بخصوص شنو جربت؟ جربت السبانش لاتيه الحاره و عجبتني (جربتها مع حليب اللوز وليس الحليب العادي)..

Perhaps Some Coffee

عسل؟ من ياب طاري العسل؟🤔 تفضل عيل لاتيه بالعسل!🍯😉 تعرف شعور حليب معسل حار مع شوت اسبريسو ☕️ جنك ماتدري؟ تقول "أخيييه" أقولك "وصل شعورك!" 👍 هذا الكافيه يتميز بالاتيه العسل ، الي معاي حبوها وايد بالنسبة لي جربت قهوتهم اليديدة لموسم الشتا فقط و اهي الgingerbread وايد حبيتها اهي مع بسكوتتها 🍪 ، المكان وااايد صغير و ديكوره مميز و ملفت، والأحلى ان قعدته الخارجية شرحة و تناسب جونا هالأيام، صح نسيت أقولكم جربت سندويتش التركي وايد لذيذة أنصح فيها بقوة 💯👌

Pause

وي وي لاتوقف! اعذرني بس الكافيه اسمه جذي 🙈 لأن يدري لا ييت صوبه راح توقف وهذا اللي صار فيني، كنت رايحه لكافيه يمه و بالصدفة شفته ووقفت عنده 👀 ، دخلت و ماشاءالله انبهرت بشراحة المكان، القعدة الداخلية وسيعة بعكس الكافيهات المجاورة له 👍 و بعد عنده قعدة خارجية، شنو جربت عنده؟ جربت Cubano و كانت شي قوي ، بصراحة يازت لي💕☕️


وي! شفيك بعدك واقف؟ 😱 ياللا تحرك ورانا لستة نخلصها 😎💪



🌷☕️

SBH

ليدبروا

بسم الله الرحمن الرحيم

ليدبروا

O.o°• O.o°• O.o°• O.o°• O.o°• O.o°•  O.o°• O

الكتاب الأول للقارئ مشاري البغلي، وكانت بداية موفقة ماشاءالله عليه 👏 ، الكتاب عبارة عن رحلة تدبر ميسرة و مسهلة و مبسطة لفهم الصغير قبل الكبير و للمبتدئ قبل المتمرس، الرحلة تجول بشرح آيات كل من السور : العلق ، الملك، القمر، البروج.

قراءة الكتاب مريحة بشكل 😍 مو لأن صفحاته (ماتتعدى 127) قليلة، لا لأن الشرح فيها سهل الفهم بطريقة مريحة حبيتها 💕 ، والأحلا إن من تخلص قراءته تحس بشعور وايد مفرح يحفزك تسمع السي دي اللي مع الكتاب بصوت القارئ نفسه للسور المذكورة، و حزتها تشعر بالفخر إنك فاهم -بإذن الله- آية آية.

جعلنا الله و إياكم من المتدبرين لكتابه 🌷💕

📔 عنوان الكتاب: ليدبروا (مع وجود سي دي صوتي)

🖋 الكاتب: مشاري البغلي

📊 التقييم: 5/5

☕️📚

SBH

Big Little Lies

بِسْم الله الرحمن الرحيم

Big Little Lies

O.o°• O.o°• O.o°• O.o°• O.o°• O.o°•  O.o°• O

I've just finished reading this novel that I didn't like it mush (except the ending thou). The novel tells story of three women's life. They are friends and each one of them is a mother with her own family problem. Real life sort of problems. All of them have kids in the same kindergarten. In the same place an incident involved the children had occurred which started the gossiping, lying, hatring leading to a murder!

If you like women problems, gossiping, much of "she hates me" and "she didn't say hi to me" ? Then you will love this one! I'm not much with this type. Also I found this novel went so long and slow that made me bored 😐 But gotta admit some parts were funny that I laughed , and the last few chapters were breathtaking that made me rated it 3 instead of 1!

As I said; this novel is highly recommended to "Woman's Problem/Gossipng/Real life issues/thriller" readers.

📔 Title: Big Little lies

🖋 Author: Liane Moriarty

🌟 My Rate: 3/5

📚☕️

SBH

ديزني Untold

بسم الله الرحمن الرحيم

ديزني Untold

O.o°• O.o°• O.o°• O.o°• O.o°• O.o°•  O.o°• O

عشاق ديزني .. نعم انتم! 😎 هذا الكتاب بإذن الله راح يعجبكم 👍، يتكلم عن أصل قصص ديزني المشهورة، و راح تكتشفون من الكتاب شلون العم ديزني وعياله خففوا من بشاعة نهاية بعض القصص 😱 خففوها عشان تتهنون فيها انتو قبل عيالكم، بالله منو يبي سنوايت مجرمة و لا سندريلا حقودة 😮 (بغيري طبعا 😈).

الكتاب يتكلم آيضا عن أصل أشرار قصص ديزني 🤗 (مو كله أميرات و أبطال عاد! صار وقت الأشرار😇)، و بصراحة حبيت الإنصاف في الطرح، يعني بعض الأشرار صج يكسرون الخاطر!😅

خلص الكتاب؟ لا لا بعد اصبر شوي 🤓، آقولك الكتاب بيعجبك 😁، يدخل الكاتب معانا بفصل يديد عن "مؤامرات ديزني" شغلات تخليك تعيد تشوف بعض الأفلام من يديد! (طلعوا مو هيني العاملين في ديزني )🙈🙊

ها خلصت؟ لا لحظة ليش مستعيل 😏! الكاتب خالد الفيلكاوي ياخذك بجولة في عالم مدينة ديزني الواقعي 🎠🏰، يخليك تفكر تحجز أول تذكرة لكالفرونيا! 🚀

مختصر العبارة، وايد حبيت الكتاب مع بعض الملاحظات مثل عدم وجود مراجعة لغوية، اغفال طرح بعض الأعمال المعروفة لشخصيات ديزني، الإسهاب في التعليق على بعض الصور، و في شي.. مادري.. بالنسبة لي استغربته ان مافي خاتمة بالاخير 🤔 يعني فجأة الفهرس 😅.

آنصح فيه؟ اي نعم آنصح فيه لمحبي عالم ديزني 😍👏👏

📖 الكتاب: ديزني Untold

🖋 الكاتب: خالد الفيلكاوي

📊 تقيمي الشخصي: 3/5 

🤓📚

SBH

الدنيا ربيع و الجو بديع

بسم الله الرحمن الرحيم

الدنيا ربيع و الجو بديع

O.o°• O.o°• O.o°• O.o°• O.o°• O.o°•  O.o°• O.o°• O

ماشاء الله الجو هاليومين يهبل ☺️🌷، لحظة لحظة لا تستعيل! 😅 ادري مو ربيع بس شتانا يبدي ربيعي بطريقته😁 قبل لا يصدمنا بالبرد يومين😱 بعدها يرجع يدفي 🙄، فقلنا نعنونه بالربيع! المهم ما علينا ، شرايكم نغديكم برا؟ 🤔 ولا تبون عشى؟ خلاص خلاص ريوق عشان تكسبون اليوم من بدايته؟ ولا قهوة العصاري و المغربية بمكان مفتوح؟ تفضل معاي خل أدليك المشوار..

الكويت تتميز بمجمعات مطاعم.. نعم مجمعات مطاعم وليس محلات تسوق، تمتاز هالمجمعات ان مطاعمها لها قعدات مكشوفة تناسب هالأجواء الحلوة 💕🌤، ومن هالأماكن عندك:

_____________________

مروج

Murouj

____________________

مكان من أجمل الأماكن المفتوحة 👍، عبارة عن مطاعم/كافيهات/محلات ترفيهية يم بعضها لها قعدة خارجية مميزة بالإضافة للقعدة الداخلية 👌، المكان شبابي و عائلي بنفس الوقت، أنصح فيه بشدة بالشتا 🌥❄️ (لما يبرد الجو)، و الأحلا انهم من فترة لي فترة يستضيفون فعاليات لعرض المشاريع الشبابية 🎊  في أشكاك جدام المطاعم، منها تاكل و منها تتسوق 😎💸 ، شنو راح تلقون في مروج؟ 🤔 التالي:

Crumbs

The Chocolate Bar

Caribou

Starbucks

b+f Burger Boutique

Trapani

Kumar

Hayat

Entrecote

Crepe De Licious

Marshmallow World

Burrow

Jar

Kateh

Intersport

Trampo

كرك غلام

خنين

صباح و مسى

📌 اسم المكان: مروج

📍 العنوان: طريق الدائري السادي، قرب نادي الصيد والفروسية | Map

💻 الموقع: Instagram | Web

🌟 التقييم: 5/5

ملاحظة: جميع الصور في هذا المقال تعود ملكيتها لأصحابها.

SBH

اقرأ

بِسْم الله الرحمن الرحيم

اقرأ

O.o°• O.o°• O.o°• O.o°• O.o°• O.o°•  O.o°• O.o°• O

دخل شهر ١١ 😍 ، شنو معناته؟ لا لا مو thanksgiving 😅 ، هذا شهر القراءة 😉، موسم معرض الكتاب 📚 ،الموسم اللي انطره كل سنة 🎉، العام كان المعرض سيّء بس هالسنة وايد تحسن من ناحية الكتب و من ناحية الفعاليات اللي فيه. 👏👏

معرض الكويت الحادي و الأربعون للكتاب مقسم كالتالي :

- صالة 5 : للدور العربية و العالمية المستضافة 

- صالة 6 : للدور المحلية و الأجنبية 

- صالة 7 : صالة الطفل فيها جميع الدور والكتب الخاصة بالأطفال بالاضافة لبعض السفارات

- الممرات بين صالة و صالة: فيها أجنحة الصحافة \ الهيئات\ الوزارات .. إلخ

📚 أما الكتب اللي شريتها:

- قصص لا يسمحون لي بنشرها ( دار نوفا )

- نبوءات الشتاء و الصيف ( دار نوفا )

- العالق في الزمن (دار نوفا )

- الكتابة من الكتابة ( مكتبة تكوين )

- الشخصية الذكية ( دار الرسالة )

- ديزني Untold ( دار سبارك )

- إتكيت الروح ( دار دريم بوك )

- جثة في فندق ( دار العربية للعلوم )

🔅 اسم المعرض: معرض الكويت للكتاب

🔅 موقع المعرض: أرض المعارض الدولية - مشرف

🔅 الصالات: 5 - 6 - 7

 🔅 الفترة: 16 - 26 /11 /2016

 📚💕

SBH