السياحة في النمسا

بسم الله الرحمن الرحيم

السياحة في النمسا

___________________________

Resslpark

-Karlskirche-

تشتهر هالبقعة بكنيستها Karlskirche اللي تقام فيها عروض دورالأوبرا 🕴🎼، و الحفلات الموسيقية.
المكان يصلح للتصوير الخارجي.

📍الموقع: Map

Kahlenberg

قمة جبل كالينبيرغ ⛰ الموقع المثالي لتصوير مدينة فيينا (عاصمة النمسا) بالكامل 📸، وفيها كافيه صغير وهم محل للتذكارات مع جرس جدام الكنيسة له سور مصغر يحطون عليه أقفالهم كمعتقدات خاصة فيهم لدوام علاقاتهم.

📍الموقع: Map

Seegronate Mine

ربعنا يسموونها مغارة هتلر، الله آعلم ليش! 😅 المهم هالمغارة عبارة عن كهوف تحت الأرض بالقرب من مدينة هينتربورل، كانوا يستخدمونه كمنجم للجبس بعدها غرق في عام ١٩١٢ مما أدى إلى إغلاقه، بس فتحوه عام ١٩٣٠ كمعلم سياحي.

أما ربعنا ليش يسمونها مغارة هتلر 🤔؛ آتوقع لأن المغارة استخدمت في الحرب العالمية كمستودع لأسلحة الجيش الالماني.

📍الموقع: Map

Laxenburg Castle

بحيرة تقع بوسطها قلعة لاكسنبورغ 🏰، فيها قوارب و قواري للايجار، آما القلعة فتعبرون لها عن طريق عوامة متواضعة كآنها تلفريك مائي مادري شنو يسمونه بالعربي 😂 المهم إنكم لاوصلتوا تقدون تدخلونها كمتحف بس على حظنا كانو مسكرينها، ويمها مطعم كافيه صغير.

📍الموقع: Map

Wiener Prater

حديقة ملاهي براتر 🎡، أول ماتوصلون راح تستغربون تحسبونها صغيرة لكن ماشاءالله ألعابها وايدة، يعني لعبة يم لعبة ببطن لعبة! وايد حلوة تناسب كل الأعمار. الألعاب تبدا تسكر من ٩ ابتداءً بألعاب اليهال لين ألعاب الكبار على ١٠و المطاعم على ١١.

📍الموقع: Map

Historic Center of Vienna 

طبعا السنتر المكان المحترم للتسوق بضمير 😍👍 بس قبل لا تتسوقون نصيحة مرو هالكافيه ترا عندهم برد جيلاتو قوي!

📍الموقع: Map

🍨 موقع الجيلاتو: Map

Designer Outlet Parndorf

الآوتليت الممتع اللي يشتهر بأغلب الماركات العالمية مثل غوتشي برادا بربري ..إلخ، والحلو بالموضوع انهم وسعوه وزادو عليه كونسبت يديد اسمه فاشن آوتليت، فيه محلاتهم و ماركاتهم المحلية بس ماكان مفتوح بشكل كامل.

📍الموقع: Map

Mariahilf Str.

شارع ماريا هلفر عبارة عن شارع على إمتداده محلات ومطاعم ومقاهي، يمتاز أكثر بمحلاتهم و منتجاتهم المحلية. الشاريع ياي بالطول و على يمينه و يساره المحلات، بس ما طولنا فيه وايد (بس ساعه وحده) عشان جذي تغطيتي ناقصة.

📍الموقع: Map 

⚠️ ملاحظات:

١. كانت الرحلة جماعية مع سفريات اليوسف (الرابط هنا).

٢. الرحلة تضمنت ٤ دول و هذه الدولة الأولى، سيتم وضع تغطية كل دولة في مقال منفرد.

٣. جميع الصور في هذا المقال تعود ملكيتها للمدونة نفسها.

✈️🎯

SBH

The Fire Child

بسم الله الرحمن الرحيم

The Fire Child

O.o°• O.o°• O.o°• O.o°• O.o°• O.o°•  O.o°• O

The Fire Child novel talks about Rachel; normal girl with a normal job who just married a wealthy handsome man (David). He has a beautiful kid names Jamie. She moved to her hasband's Carnwall house. The new life was perfect; handsome husband, amazing stepson and huge great house. Not much to add until her stepson (Jamie) start talking about his dead Mom. We are talking about a dead-mother haunting her own son! Plus few disturbing events started to occur which made Rachel digging the mystery past of her new husband. Are we done? No. It just started when Jamie told his step-mom:"You will be dead by Christmas".

I really liked the idea. It was mysterious- drama type. Just my read! Where did it fail me? Not the ending (actually the ending was perfect), it was the middle chapters. They were long-boring ones maybe because of the leak chatting phrases? I don't know, but it really bored me!

📔 Title: The Fire Child
🖋 Author: S.K. Tremayne

🌟 My Rate: 3/5

📚☕️

SBH

قهوة تايم الجزء الثالث

بسم الله الرحمن الرحيم

قهوة تايم

(الجزء الثالث)

___________________________

المقال يتبع تجاربي الشخصية لكافيهات الديرة (لقراءة التجارب السابقة : قهوة تايم الجزء الأول ، قهوة تايم الجزء الثاني).

خل نبدي باللستة اللي هالمرة أطول من الأجزاء اللي فاتت 😅 وقبل لا نبدي خلوني أوضح شغلة؛ المقال يطرح تجربتي الشخصية للكافيهات وذوقي الخاص في القهوة، و بالنسبة للكافيهات بعضها زرتها لمرة وحدة فقط والبعض تعددت زياراتي، يمكن بعض الكافيهات تدهورت للأسف  بعضها تسنع 👍، لذا زيارتكم تعتمد على رايكم و توقعكم انتوا، اما انا فمهمتي هني اني أعرض تجربتي باللحظة اللي زرت فيها هالأماكن والباجي عليكم.

و الحين خل نبدي:

      Caffeine      

ادري بتقولون "احنا ناقصين؟" بس من صجي اهو الكافيه اسمه جذي 🙈 تحصلونه بسومو بالمباركية، له قعدة داخلية و خارجية و ديكوره بالفعل مميز اصلا تكفي كلمة "اقلط" عالباب 😂 شنو جربت عندهم؟ ان ما خاب ظني كنت مجربة لاتيه لأن ماكان الفلات وايت متوفر.
📍 موقع الكافيه: Map
📸 حساب الكافيه: Instagram

      But First Coffee      

هذا اللي مستغربة شلون للحين ماكتبت عنه على كثر ما رحت له! 😱 خل اقولكم شنو يتميز فيه، تحبون القهوة التركية؟ تمام. تحبون السبانش لاتيه؟ تمام. عيل خل نراضي ذوقكم و نخلطهم مع بعض!😎 وي لحظة لاتنحاشون ماهي لغاويص  😅 انتوا بس طلبوها و ادعولي 😏👌

غير جذي مشتهي كاكاو؟ من اقوى الكافيهات اللي تسويلك حليب كاكاو، هذا بصوب ولا بغيت تطلب لاتيه و تزيده ببشارة من الكاكو المخلوط صوب ثاني 😋، انتوا للحين هني؟ يالله روحوا🏃🏻 وي صاجين نسيت أقولكم موقعه 🤦‍♀️ الكافيه موجود في حديقة الشهيد و أيضا في برج الحمرا.

📍 موقع الكافيه:  Map1 | Map2

📸 حساب الكافيه: Instagram

      CAV      

مشروع شبابي مميز، موقع الكافيه في برج كريستال (كريستال تاور) بالسرداب، المميز في هالكافيه ان فيه قاعة مخصصة للاجتماعات 👥 والقعدات هم مميزة فيها مكاتب للدراسة 👩‍💻 بشكل عصري-مريح-عملي!

شنو جربت عندهم؟ جربت لاتيه مع كورنفليكس كاكاو اسمه Flakes Latte .

📍 موقع الكافيه: Map

📸 حساب الكافيه: Instagram

      Savage      

كل ما اقرا اسمه تطري علي عبارة "واااي هلاااقة" 😂، اي نعم معاكم كافيه هيلقي! 🤡 الكونسبت مال هالكافيه مميز بشكل ممتع، بعيد عن الرسميات و الحجي الفاضي، شي عفوي شبابي و شغل ميانة عالآخر، باختصار لا دخلت بتحس انك في بيتكم!
اللي جربته عندهم كان "هيلقي دافي" للي يحب طعم النعناع بالقهوة راح تعجبه، و هم عندهم "أم كشة" عبارة عن قهوة بشعر بنات.

📍 موقع الكافيه: Map

📸 حساب الكافيه: Instagram

      Kofe      

حبيب القلب كوفي و هل يخفى القمر 💚 هالكافيه يتبع مطعم The Gathering Bistro، شنو المميز بهالكافيه؟ انك تقدر تعدل بالقهوة على مزاجك ☕️💆 تبيها بهالنوع من التحميص ولا هالنوع من البن ، تبيها لاتيه و لا موكا، تبيها حار ولا بارد، تبيها بإضافات ولا بدون، من الآخر مافي شي تقول مايعجبني لانه اهو يحط لك المنيو على مزاجك و احترافيتك انت بالطلب 😌🔝 واذا ماياز لك الوضع عندهم قائمة بقهوات و خلطات خاصة فيهم و عليكم بالعافية. اللي جربته كان: Flat White Fruity.

📍 موقع الكافيه: Map

📸 حساب الكافيه: Instagram

      Bon      

هذا يفترض بأول القائمة! 😭💙 اتوقع نسيت عدد المرات اللي رحت له فيها! أقوى كافيه محلي يقدم قهوة Flat White مضبوطة 👏💯 ، عادي أتعنى بس عشانها، الحلو بهالكافيه إن له مدخلين أمامي و خلفي فمعناته قعدتين؛ خارجية و قعدة داخلية.

📍 موقع الكافيه: Map

📸 حساب الكافيه: Instagram

👈 بجذي أوقف لأن بصراحة تعبت 😅 بقت 5 كافيهات جربتهم بعد و إن شاء الله أنزلهم بالمرة الياية.🤝

🌷☕️

SBH

⚠️ ملاحظة: الصور دون توقيع إسم المدونة تعود ملكيتها لأصحابها.

Dubai Parks

بسم الله الرحمن الرحيم

Dubai Parks

__________________

من المشاريع الناجحة إلى زرتها في دبي كان مشروع منطقة  لمدن ملاهي متصلة ببعضها تحت مسمى دبي باركس، بالإضافة إلى فندق و نهر صناعي و منتجع عائلي.

شخصيا ماسكنت بالفندق ولادخلت المنتجع إلي ما أظن خلصوا للحين، المهم دخلت المدن الثلاث وهي: LegoLand, Motiongate, Bollywood . الحلو بالموضوع إن من مدينة لي مدينة تطلعون تشوفون نهر و مطاعم و كافيهات و بعض المحلات و كلهم على طراز أوروبي كلاسيكي في التصميم، بإختصار ريف أجنبي 😍، وعلى فكرة كل مدينة لها أوقات عمل خاصة، وبجذي يخلون الحشد يتحرك بين المدن على أوقات عملها.

⬅️ والمدن الترفيهية إلي دخلتها بالترتيب هي:

                                                

Lego Land

                                                

طبعا هالمكان مناسب جدا للياهال (الأطفال) يلائم الأعمار 2-12 سنة تقريبا 👧🏻👦🏻، و بالنسبة للكبار هم راح تستانسون بكمية التصاميم و المجسمات إلي مشكلينها من التركيب. طبعا هذا صوب و اذا بتناشب عيالك بألعاب الليزر صوب ثاني 😜 ، بمعنى آخر العايلة كلها بتستانس بالأجواء  😉 👨‍👩‍👧‍👦

إي صح و قبل لا أنسى، بالمدينة نفسها فيها قاعة بمجسمات مصغرة لمعالم عالمية من الليقو (التركيب)، القاعة راح تصدمكم بكمية التفاصيل الدقيقة في التجسيد 👏👏

                                                

MotionGate

                                               

المكان أعتبره هوليوود بصراحة! يعني تدخل كل التصاميم و المجسمات تحسسك بتصور فلم!🎥🎞 المكان أغلبه ألعاب ليزر و عروض يعني في المسرح إلي تتم فيه عروض حية مثل street dance و هالمجرى، ويفترض في قطار لكن يوم رحنا كان بعده قيد الإنشاء.

وشنو اللي راح يعجب الصغار؟ مدينة السنافر!😏 عيالكم راح يكيفون فيها حتى فيها مطعم خاص بالسنافر:

طبعا هذا غير كافتيريا تحت تصميم فلم Cloudy with a Chance of Meatballs :

                                                

Break Time!

                                               

كان في عرض بالموشن قيت نبي نشوفه بس ينعرض بعد فترة طويلة فقلنا نتغدا و نرجع له، وبما إن المطاعم داخل المدن تعتبر بسيطة مو نفس المطاعم إلي بالممرات فكانت الخطة نطلع نتغدا بواحد من المطاعم إلي برا و نرجع ندخل من يديد ( مسموح لك تطلع وتدخل كثر ماتبي بنفس اليوم).

وهذا كان إختيارنا🍟🍔 ، وعقبها رجعنا للعرض إلي ممنوع فيه التصوير!

                                                

Bollywood

                                               

و هذي كانت محطتنا الأخيرة لأن هالمدينة آخر مدينة تسكر من بينهم، و عاد الهنود و رقصهم! 🇮🇳💃🕺 تخيل وانت تمشي فجأة يرقصون جدامك و يبدا العرض! إي نعم مو شرط مسرح 😎 ، عروضهم بالممرات يونسون 👍👍 ، هذا غير طبعا المسرح الكيبر اللي فيه تأثيراته روعة لكن للأسف مادخلناه لأن يومها كان العرض خاص عن آلهتهم ومعتقداتهم (مايصلح لنا كمسلمين).

و أيضا فيه ألعاب الليزر و السينما ال3D و 4D و السينما اللي تتبع فلم كاريش كانت روعة، أحسن سينما متحركة بالمدينة كلها 😍💕👏

قبل لا أنسى في استيديو يورونكم شلون يصورون أفلامهم ويختارون من الجمهور ناس تساعدهم بالتصوير وبالأخير يورونكم اللي مثلوه المتطوعين جدامكم كفلم قصير🎞🎬
على الساعة 7:30 تقريبا بدا الاستيديو المباشر، عرض مسرحي مباشر ممتع:

آخر شي طلعنا حلينا بالكافيهات اللي برا 🍧🍨(هالكافيه طول الوقت نمر عليه من كثر ما ألوانه تشوق قعدنا فيه ):

وبجذي خلصت جولتنا على الساعة 10:30 - 11:00 تقريبا.
المكان يستاهل العنوة ، وايد حلو ومرتب و منظم، تذكرتنا حجزناها من الكويت لأن كان في عرض فتقريبا طلعت التذكرة ب25 د.ك.
منو راح يستمتع بالمكان؟ العايلة الكريمة كلها ولكن الألعاب راح يستانسون عليهم الصغار أكثر لأن أغلب الألعاب لهم  وانتوا استانسوا بالليزر والسينمات و اذا بتلعبون بضمير عندكم IMG مو كل مكان لكم عاد خلوا مجال لعيالكم 😂😜

📌 إسم المدينة: Dubai Parks

⏰ ساعات العمل: 10 ص - 10 م (تختلف على حسب المدينة اضغط هنا)

📍 الموقع: Map

📲 الرابط: Insta | Web

🌟 التقييم: 5/5

🎡🎢

SBH

⚠️ ملاحظة: الصور دون توقيع إسم المدونة تعود ملكيتها لأصحابها.

الشخصية الذكية

بسم الله الرحمن الرحيم

الشخصية الذكية

________________________________

الكتاب حلو و خفيف بالإضافة إلى أن المحتوى سهل الفهم وميسر 👏 وايد مريح في القراءة للأشخاص اللي يحبون كتب تطوير الذات و ايضا وايد يسير لمبتدئي القراءة في هذا المجال 😉

طبعا فكرة ادخال صورة واحدة تمثل كل فصل تعتبر فكرة حلوة و مختصرة في حالة تبي تراجع الفصول تقدر تكتفي تفتح الصورة الخاصة بالفصل وراح تتذكر محور حديثه بإذن الله 👍

كتاب موفق و يستحق القراءة ☺️🌷

📖 الكتاب: الشخصية الذكية

🖋 الكاتب: الحارث المزيدي

📊 تقيمي الشخصي: 3/5 

🤓📚

SBH