الأماكن السياحية في سلوفينيا وسويسرا

بسم الله الرحمن الرحيم

الأماكن السياحية

في سلوفينيا و سويسرا

___________________________

بما إن ما تجولنا بهالديرتين وايد فدمجتهم في مقال واحد

 (مع الأخذ بالإعتبار إن ما نمنا في سويسرا فقط نروح و نرجع 🚌):

Lake Blade

بحيرة بليد، بحيرة تقع في دولة سلوفينيا، تقريبا فيها كل  الأنشطة اللي تطري على بالك 😎.. ابتداءً من جولة بالقارب إلى الزحلاقيات المنتجعات المحلات القفز المظلي..إلخ، في ملاحظة على الجولة البحيرية بالقارب.. ترى يوصلكم وينزلكم في كنيسة صايرة بنص البحيرة، طبعا ماعليكم من الكنيسة.. تقدرون تتمشون وتصورون وفي كافيه صغير اذا اشتهيتوا تطلبون جيلاتو 😏🍨، البحيرة وايد حلوة أنصح بزيارتها.
📍الموقع: Map

Postojnska Jama

كهف بوستونيا 👷⛏ يعتبر أكبر كهف في سلوفينيا، درجة الحرارة فيه تتراوح بين ٨-١٠ درجات سيليزية، وانتو تتمشون الى بداية الكهف راح تمر عليك محلات تذكارية ومطاعم و كافيهات، و بس توصلون كل الجموع يتقسمون على حسب اللغة اللي تتكلمها وتفهمها 🗣، طبعا عربي مافي فصرنا مع اللي يتكلمون انجليزي.. و بس تدخلون مع المرشد (ممنوع تدخل من غيره) . يركبونكم قطار صغير يوصلكم لي داخل و تبدي جولتكم مع شرح المرشد اللي بصراحة ماكنت معاه و طول الوقت اصور 😅 ، بس تقدون تتعرفون عن الكهف بشكل أوضح من هالمقال الروعة (هنا) 👏 أشكر أصحابه.
📍الموقع: Map

Ljubljana Central Market

سنتر سلوفينيا في عاصمتها ليوبليانا، السنتر فيه جسر الأقفال 🔐 وحوله  كله كافيهات و مطاعم و في محلات بس السنتر جدا بسيط على إن في محلات عالمية بس الشعبية و الكافيهات أكثر من المحلات.

يصلح للتسوق؟ أشوفه يصلح للتمشي و للتقهوي أو للغدا أكثر من التسوق. وهم تقدرون تستمتعون بالعروض الموسمية اللي تقام بالسنتر.
📍الموقع: Map

Locarno City

مدينة لوكارنو، مدينة موجودة بسويسرا تطل على بحيرة يغلب عليها النمط الشعبي، راح تلاحظونه من الأشكاك المتوزعة بالقرب من البحيرة (كأنه سوق الأحد) مع وجود ألعاب بسيطة 🎡، يعني تصلح للتمشي و هم لركوب القوارب. المنطقة هادية و نظيفة بس للي ما يحب الطبيعة راح يمل.
📍الموقع: Map

Lugano City

مدينة لوغانو.. هذي أسميها مدينة عيال الجخ!😂💰 أصلا سياييرهم تحسسك إن البنتلي سعره ١٠ دك! ماشاء الله ، الله يرزقنه من حلاله 🙌، المهم ما علينا منهم.. المدينة لها بحيرة بنصها و على إمتداد البحيرة محلات و بوتيكات لماركات عالمية (برادا، كارتير، فندي، روليكس..إلخ). و تبون الأحلى؟ في محل عطور صغير يبيع أقوى خلطات العطور في سويسرا 😍.. يعني بالراحة أقل قرشة يمكن سعرها ١٠٠دك 😅 !
📍الموقع: Map

غير جذي المدينة فيها جبل مونت تامارو ⛰ (Monte Tamaro) و هالجبل أحد سلسلة جبال الألب، تصعدون قمته على مرحلتين بالتلفريك 🚡، المرحلة الأولى فيها استراحة و الآلعاب للصغار، المرحلة الثانية عبارة عن القمة فيها الزحلاقية العودة و من هالسوالف مع كافتيريا و بحيرة مصغرة و هم في ألعاب للصغار، غير جذي راح تشوفون البقر السويسري يتمشى هدد 🐮🐂😂👍💕 
📍الموقع: Map

⚠️ ملاحظات:

١. كانت الرحلة جماعية مع سفريات اليوسف (الرابط هنا).

٢. الرحلة تضمنت ٤ دول و هنا دولتين -الثانية والثالثة- ، سيتم وضع تغطية الدولة الأخيرة في مقال منفرد.

٣. جميع الصور في هذا المقال تعود ملكيتها للمدونة نفسها.

✈️🎯

SBH