بسم الله الرحمن الرحيم
IMG Worlds
of Adventure
__________________________________
ماشاء الله الإمارات كل مالها و تسحرنا بمشاريعها 👏، منو فيكم راح مدينة الملاهي IMG في دبي؟ للي راحوا شرايكم فيها؟ تسحر عدل؟ و للي بعدهم ماراحوا خل نحمسكم شوي عالروحة 😉
مدينة آي أم جي تعتبر إلى الآن أكبر مدينة ألعاب داخلية مغلقة و مكيفة، تبعد بمايقارب 15 دقيقة عن وسط مدينة دبي، يعني ماكو عذر 😜 حر صيف شتا برد مطر.. تقدرون تروحون بجميع الأحوال الجوية بإذن الله.
المدينة مقسمة إلى 4 مناطق تقريبا، منطقة بالنص اسمها IMG بوليفارد للمحلات و المطاعم و لعبة فندق الرعب (اللي شكلهم ماعرفوا بأي عالم يحطونه فاموا حطوه بالنص ) أما المناطق الثلاث فهي لعوالم شخصيات كرتونية شهيرة: عالم شخصيات مارفل (ثور، آيرون مان، سبايدر مان..إلخ)، عالم شخصيات كرتون نتورك (الصبي اللي يلبس ساعته ويتحول نسيت اسمه 😅، فتيات القوة، غامبول..إلخ)، وأخيرا عالم الديناصورات ، وفي منطقة خامسة اسمها نوفا سينما بس ما انتبهت لها بصراحة فمادري لو مفتوحة ولا قيد الإنشاء.
طبعا لاحظتوا شلون الديكور متعوب عليه بشكل واضح ، شي يبهرك قبل لا يبهر عيالك 😍، و بخصوص الألعاب، ألعابها غالبيتها تناسب الكبار فيعني لا تحاتون أظن عيالكم بيتحلطمون لاشافوكم تلعبون أكثر منهم 😆😂
وبخصوص قطارات الرعب، في قطار واحد يطلع لي برا ويرجع يدخل، هذا ضروري تركبونه في مدينة اليناصورات 👍👍، أصلا غير جذي في قطار اللي يصعد 90 درجة ويرجع يهبد مرة وحدة! 😱 (يطيح لغير متحدثي اللهجة الكويتية) في نفس المدينة، غير جذي السينمات نظام ال3D 5D 🎬
لحظة لحظة وين رايح! ما يبت طاري فندق الرعب بعدي 😒، اي نعم فندق الرعب اللي الزومبي يستقبلك لا ويصور سيلفي معاك 👻 بس دير بالك لا تزعجه ترا عادي يركض وراك! 😰 طبعا الفندق تمشي فيه و يدخلون قروبات تقريبا 6-7 أشخاص تمشي معاهم من غرفة لي غرفة.. وباجي الصراخ أقصد الاستكشاف عليكم وسلامتكم! 😙 (خبركم عقب التقلب و قطارت الرعب قالوا حسافة ما نحلل جم صرخة قبل لاتمشون 😂😂).
💡 معلومات عالطاير:
- زيارتنا كانت 11 لي 5:30 (تغدينا فيها)
- حجزنا التذاكر عن طريق الفندق 195 درهم للبالغ.
- ماشفنا عروض حية في المناطق (شكلهم يبلشون بليل)
- طابور الإنتظار كان سريع لأن يايين خلال أيام الإسبوع.
- أغلب الألعاب يمنع التصوير خاصة لعبة فندق الرعب.
📌 إسم المدينة: IMG Worlds of Adventure
⏰ ساعات العمل: 11 ص - 9 م (10 م نهاية الإسبوع)
📍 الموقع: Map
🌟 التقييم: 5/5
🎡🎢
SBH
⚠️ ملاحظة: الصور دون توقيع إسم المدونة تعود ملكيتها لأصحابها.
