الأماكن السياحية في إيطاليا

بسم الله الرحمن الرحيم

الأماكن السياحية في إيطاليا
(ميلان - البندقية)

___________________________

Venice

البندقية، وما أدراك ما البندقية 😍🎭🛶! الحمدلله حصلت الفرصة أشوفها، وايد حبيتها و حبيت سكيكها و ممراتها و فوق هذا كلها ممرات المائية وجناديل.💕 كافي ان المحلات والمطاعم والفنادق..إلخ أغلبهم لهم بابين باب مرسى للقوارب وباب عالسكة. 👍 اللي يعجبني أكثر إنهم حافظوا على الطابع التراثي بشكل بارز من الخارج وحدثوا اللي داخل.👏👏
📍الموقع: Map

Trieste

مدينة على شمال شرق إيطاليا تطل على المينا المشهور عندهم، 🛳 المدينة تشوق كلها محلات و كافيهات بس لسوء الحظ وصلنا بالتوقيت الغلط؛😅 محلاتهم تفتح من ٣-٣:٣٠ العصر و احنا رحنا مبجر الظهر فما مدانا نتسوق و لكن تستحق الزيارة، و فيها كافيه برد لذيذ 😋🍨 ضروري تجربونه 😉
📍الموقع: Map

Domo

وهل يخفى القمر! 😎 الوجهة المميزة في إيطاليا و ميلان بالتحديد. تقريبا كل شي راح تحصلونه فيه بس لا تنسون تجربون البيتزا الأشهر في عالم الإنستغرام 😁🍕
📍الموقع: Map

Serravale Outlet

من أمتع و أقوى أوتلتات (مادري اذا جذي جمعها) أوروبا 😍، راح تلاحظون إنهم كبروه وزادوا فيه جزء اسمه فاشن اوتليت حق ماركاتهم المحلي، أنصحكم تخصصون يوم كامل له.🤓💸
📍الموقع: Map

San Siro Stadium

ونختم مع ملعب أكبر النوادي! 🏟 ⚽️ ما أفهم بالكرة بس أفهم بالكوس والميداليات والتِذكارات اللي ما أدري ليش ما شفتهم فيه 🤔 ضاق خلقي على هالموضوع، صح في ملاحظة الملعب راح تشوفونه بالصور رمل بدل الزرع 😅 لأنهم شايلينه بالصيف لين موسم اللعب اليديد يحطون زرع (ألحين فهمنا ليش ملاعبهم زرعم شاتر😏 -فاقع/بارز اللون-). ونصيحة لا تشترون البلايز من النادي، اخذوهم من محل النادي في الدومو ترى فرق السعر مو شوية.👍
📍الموقع: Map

وبجذي نكون خلصنا تغطية سفرة الصيف 😎👍، أتمنى إنكم إستمتعتوا و إستفدتوا من المقالات 😍💕

⚠️ ملاحظات:

١. كانت الرحلة جماعية مع سفريات اليوسف (الرابط هنا).

٢. الرحلة تضمنت ٤ دول و هنا الدولة الأخيرة ، تم وضع تغطية الدول الأخرى في مقالات منفردة.

٣. جميع الصور في هذا المقال تعود ملكيتها للمدونة نفسها.

✈️🎯

SBH